Paplajahan 5: Perjamuan Suci
I Korintus 11:17-34
Sadereng Sang Hyang Yesus munggah ka swarga, Ida taen ngajahin para sisian Idane indik ngajeng roti lan nginum anggur mangda dados painget sedan Idane. Wenten salah tunggal pasamuane iwang tatkala nglaksanayang perjamuane punika. Punika mawinan tatkala dane Paulus nulis surat majeng ring para krama druen Sang Hyang Yesuse sane wenten ring Kota Korintus, dane mituturin ipun sami sekadi puniki:
5
17 Manut tata cara sane tulis tiang puniki, tiang nenten ja ngajumang ragane. Krana ritatkala ragane mapunduh jagi ngaturang bakti, nenten ja ngasilang paindikan sane becik, nanging paindikan sane nenten becik. 18 Sane kapertama, tiang mirengin sekadi puniki: duk ragane mapunduh jagi ngaturang bakti, wenten sane maruang-ruangan tur saling matungkasan. Tiang mapineh yening ortine punika wenten sane saja. 19 Pastika wenten sane maruang-ruangan saking ragane mangda kauningin sirake sane saja pracaya ring Sang Hyang Yesus. 20 Duk ragane mapunduh, nenten pantes kaucap perjamuan suci. 21 Krana ritatkala ngajeng, ragane suang-suang saling ngamalunin ngajeng ajengane praragan, kantos wenten krama sane nenten polih ajengan. Taler wenten sane nginum kantos punyah. 22 Boyake ragane madue umah mangda ragane ngajeng lan nginum? Ragane nganistayang para semeton ring pasamuane sane nenten madue napi-napi. Ragane pada nenten ngajiang pasamuan Sang Hyang Pengardine krana ragane nganistayang ipun. Napike sane sapatutne raosang tiang kapining ragane? Patut ke tiang ngajumang ragane? Sujatine nenten ja patut.23 Krana pengajahan sane ortiang tiang idumun kapining ragane nenten tios pengajahan sane terima tiang saking Sang Hyang Yesus. Duk rahina wengi ritatkala Sang Hyang Yesus kaserahang, Ida ngambil roti. 24 Sasampune ngaturang penyuksma ring Sang Hyang Pengardi, Ida ngompes-ngompes rotine punika saha ngandika sapuniki, “Rotine ene ngambarang awak Tiange ane kapicayang sid ceninge; ritatkala cening naar rotine ene, laksanayang ja apanga dadi pinget unduk Tiange.” 25 Kenten pada sasampune wusan ngajeng, Ida ngicen cawan sane madaging anggur saha ngandika sapuniki, “Anggure ene satmaka getih Tiange. Getih Tiange ento bakal dadi janjia anyar saking Sang Hyang Pengardi. Ritatkala cening nginem anggure ene, laksanayang ja apanga dadi pinget unduk Tiang.” 26 Krana sebilang ragane ngajeng roti lan nginum anggur sekadi puniki, ragane setata ngortiang indik sedan Sang Hyang Yesuse kantos Ida mawali malih.
27 Sane mangkin, ritatkala ragane ngajeng rotine lan nginum saking cawane, sapatutne ragane subakti ring Sang Ratu Agung. Yening ragane ngajeng lan nginum antuk tata cara sane nenten patut, ragane madosa ring anggan lan rah Idane. 28 Punika mawinan, iraga suang-suang musti mreksa dewek praragan sadereng ngajeng rotine lan nginum saking cawane puniki. 29 Sapa sira ja sane jagi ngajeng lan nginum, ipun musti inget deweknyane sampun masikian sareng pasamuan Sang Ratu Agung. Yening nenten inget paindikane punika, anake punika jagi keni ukuman saking Sang Hyang Pengardi. 30 Punika mawinan wenten akeh saking ragane dados lemet tur sungkan. Samaliha wenten pada sane padem. 31 Sapatutne iraga mreksa dewek iragane dumun mangda nenten keni ukuman saking Sang Hyang Pengardi. 32 Nanging yening iraga keni ukuman saking Sang Hyang Pengardi, artine Ida ngajahin iraga mangda nenten kakutang ring kawah apine sareng manusa sane nenten pracaya.
33 Nah sane mangkin duh para semeton sareng sami, ritatkala ragane mapunduh nglaksanayang perjamuan suci, antosang ja semetone sane lianan mangda ngajeng sareng-sareng. 34 Sapa sira ja sane seduk musti ngajeng dumun ring umahnyane suang-suang. Yening sekadi punika, perjamuan ragane nenten iwang tur ragane nenten keni ukuman saking Sang Hyang Pengardi. Ritatkala tiang mrika ka Kota Korintus, tiang jagi nglanturang malih pengajahane puniki.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Sekadi napike sapatutne iraga nyalanang idup manut pengajahane puniki?"
iv. “Kapining sirake sapatutne iraga nyeritayang malih ceritane puniki?”